MARY HELP OF CHRISTIANS PARISH – TEJERO

Ang debosyon kay Maria, Mapag-ampon sa mga Kristiyano (Mary Help of Christians o Auxilium Christianorum) ay isa sa mga pinakamatanda at pinakamahalagang debosyon sa Simbahang Katolika. Ipinapakita nito ang paniniwala ng mga Kristiyano na si Maria ay patuloy na namamagitan at umaalalay sa Simbahan at sa mga mananampalataya sa panahon ng pagsubok at pangangailangan.

Batayang Biblikal
Nakaugat ang debosyong ito sa papel ni Maria sa kasaysayan ng kaligtasan:

Tinanggap niya ang kalooban ng Diyos sa pagpapahayag ng Anghel (Lucas 1:26–38).
* Namagitan siya sa kasalan sa Cana kaya naganap ang unang himala ni Hesus (Juan 2:1–11).
* Sa paanan ng krus, ibinigay ni Hesus si Maria bilang ina ng Simbahan (Juan 19:25–27).

Dahil dito, kinilala ng mga Kristiyano si Maria bilang mapagmahal na ina at katulong ng bayan ng Diyos.

Kapistahan ni Maria, Mapag-ampon sa mga Kristiyano.

Noong unang panahon pa lamang ay tinatawag na si Maria bilang:

“Auxilium Christianorum”
o “Mapag-ampon sa mga Kristiyano.”

Lalong lumaganap ang debosyong ito noong panahon ng mga digmaan at pag-uusig laban sa mga Kristiyano.

Ang Labanan sa Lepanto (1571)

Isa sa pinakamahalagang pangyayari na nagpalaganap ng debosyon ay ang Labanan sa Lepanto noong 1571. Hinimok ni Pope Pius V ang buong Simbahan na manalangin ng Santo Rosaryo para sa tagumpay at kapayapaan. Sa kabila ng matinding panganib, nagtagumpay ang hukbong Kristiyano laban sa hukbong Ottoman. Marami ang naniwalang ang tagumpay ay bunga ng pamamagitan ng Mahal na Birheng Maria.

Dahil dito:
* higit na lumaganap ang debosyon sa Rosaryo,
* at kinilala si Maria bilang tagapagtanggol ng mga Kristiyano.

Si Papa Pio VII at ang Kapistahan

Noong panahon ni Napoleon Bonaparte, ikinulong si Pope Pius VII dahil sa pagtutol nito sa pakikialam ng emperador sa Simbahan. Matapos siyang mapalaya at makabalik sa Roma noong Mayo 24, 1814, ipinagpasalamat niya ito sa tulong ng Mahal na Birheng Maria.

Bilang pasasalamat, itinakda niya ang kapistahan ni:
Maria, Mapag-ampon sa mga Kristiyano
tuwing Mayo 24.

Si San Juan Bosco at ang Debosyon

Lalong naging tanyag ang debosyon dahil kay Saint John Bosco o Don Bosco.
Malaki ang tiwala ni Don Bosco kay Maria at madalas niyang sabihin:
“Si Maria ang gumawa ng lahat.”

Itinayo niya ang tanyag na Basilica of Mary Help of Christians bilang parangal kay Maria, Mapag-ampon sa mga Kristiyano.

Sa pamamagitan ng Salesians of Don Bosco at ng Daughters of Mary Help of Christians, kumalat ang debosyon sa iba’t ibang bahagi ng mundo, lalo na sa mga kabataan at paaralan.

Ang debosyong ito ay nagpapaalala na:
* hindi pinababayaan ni Maria ang Simbahan,
* siya ay ina at katulong ng mga Kristiyano,
* at lagi niyang inilalapit ang tao kay Hesus.

O Maria, Mapag-ampon sa mga Kristiyano,
ipanalangin mo kami. Gabayan mo kami
sa aming pang araw-araw na pamumuhay, ilayo mo kami sa lahat ng masama,
at patnubayan mo kami patungo sa iyong Anak na si Hesus.

AMEN

(Fr. Randy S. De Jesus & Br. Lemuel Asuncion, FSC)

O Mariang Mahal naming Ina, Ampunin kami sa'yong puso! Yakapin mo kami nang mahigpit, Kaming sa iyo'y lumalapit.

I

Sa sandali ng hirap at sakit, May inang nagmamalasakit! Pag-ibig ay 'di pinagkait, Kaagapay patungo sa langit!

II

Pagpapalang aming tinataglay, Naranasan sa'yong paggabay! Kalinga ng 'yong mga kamay, Kapayapaan sa aming buhay!